Rama: Shfuqizojmë ligjin e investimeve strategjike, rregulla të reja sipas BE për zonat e mbrojtura
Kryeministri tha në Bruksel se ligji i investimeve strategjike do të zëvendësohet me një kuadër të ri në përputhje me standardet e BE-së.
Kryeministri Edi Rama deklaroi gjatë Konferencës Ndërqeveritare në Bruksel se ligji i investimeve strategjike do të shfuqizohet, pasi sipas tij ka përmbushur misionin për të cilin u miratua. Ai bëri të ditur se qeveria po punon ngushtë me Komisionin Europian për hartimin e një kuadri të ri ligjor, ndërsa edhe ligji për zonat e mbrojtura do të pësojë ndryshime në mënyrë që të jetë plotësisht në përputhje me standardet e Bashkimit Europian.
Ligji i ri do të harmonizohet me standardet europiane
“Na duhet të shfuqizojmë ligjin e investimeve strategjikë sepse ky ligj e ka përmbushur misionin e vet dhe po punojmë ngushtësisht me Komisionin për atë që do ta shfuqizojë. Na duhet ta trajtojmë ligjin mbështetur në të gjitha standardet europiane dhe të ndryshojmë gjithçka që s’është në pajtim me standardet europiane. Shfuqizimi nënkupton anulim.
Ligji për zonat e mbrojtura është një nga ligjet më të mira që kemi, kemi punuar shumë fort. Na duhet të trajtojmë pjesë specifike që duhet të jenë në pajtim të plotë me BE, edhe për këtë po punojmë me Komisionin. Shfuqizim nuk është një fjalë që e marrim si fjalë për të qenë në përputhje, është miratim 100% me standardet”, tha Rama.
Rama: Projekti i Zvërnecit do të zbatohet sipas standardeve më të larta
I pyetur për projektin e Zvërnecit dhe debatet që ai ka ngjallur në Parlamentin Europian, kryeministri tha se Komisioni Europian është i informuar për çdo zhvillim dhe se vlerësimi i ndikimit në mjedis është ende në proces. Ai theksoi se projekti do të realizohet vetëm në përputhje me rregullat dhe standardet e Bashkimit Europian.
“Nga vitet e gjata në detyrë, kur thua Bruksel është fjalë shumë komplekse. Për ne të gjithë zërat janë mjaft të respektueshëm, por ka një fjalë që e marrim shumë seriozisht, zëri i Komisionit. Komisioni është në krye të gjithçkaje duke qenë shumë i mirëinformuar bazuar në fakte.
Në këtë botë informacioni dhe pikëpamjeve të debatueshme ku e vërteta gjen gjithnjë e më pak hapësirë, Komisioni mbetet në fakt ai që mban fort objektivitetin sepse punon bazuar në fakte, të dhëna, burime të verifikuara. Jam i sigurt që edhe ju, nëse do të kishit interes për faktet, për të dhënat, burimet e verifikuara do të kuptonit se nuk ka asgjë për t’u shqetësuar.
Projekti është ende punë në vazhdim. Projekti nuk mund të shihet askund sepse s’është finalizuar. Vlerësimi i ndikimit në mjedis është në proces e sipër. Gjithçka po bëhet sipas rregullave që prej ditës së parë. Përmendja e emrave nuk është diçka që na ndihmon për të shkuar tek e vërteta. Për ne vlen libri i rregullave të standardeve të anëtarësimit dhe Komisionit të BE.
Ideja që Shqipëria do të vazhdonte përpara me diçka që nuk do të ishte në përputhje të plotë me librin e shenjtë të besimtarëve ateistë në Shqipëri është pretendim pa bazë. S’ka asgjë për t’u shqetësuar. Do të bëjmë një projekt që do të jetë krenari për Shqipërinë dhe Europën. Kjo është ambicia ime. Shqipëria duhet ta bëjë realitet për vete dhe Europën. Do të jemi rigorozë për të mos kërkuar asgjë veç standardeve më të larta”, deklaroi kryeministri.
k.jpg)